Тараз қаласында дзюдодан Олимпиада чемпионы Елдос Сметовтың өмір жолына арналған «Елдос Сметов. Төзім. Сенім. Жеңіс» атты кітаптың таныстырылымы өтті.

Кітап авторы — белгілі журналист, қаламгер Есбол Нұрахмет. Туындыда спортшының балалық шағы, спорттағы алғашқы қадамдары, халықаралық жарыстардағы жетістіктері және Олимпиада шыңына жету жолындағы еңбекке толы кезеңі қамтылған.

Тұсаукесер рәсіміне Жамбыл облысы әкімінің орынбасары Серік Сәлемов, облыстық ардагерлер кеңесінің төрағасы Еркінбек Солтыбаев, облыстық дене шынықтыру және спорт басқармасының басшысы Ернар Ибраимов, сондай-ақ Елдос Сметовтың алғашқы бапкері Ахмет Жұмағұл мен қазіргі жаттықтырушысы Ғалымжан Жылгелдиев қатысты.

Жиында сөз сөйлеген Серік Сәлемов бұл еңбектің жас буынға тәрбиелік мәні зор екенін атап өтті.

Олимпиада чемпионы Елдос Сметов өз кезегінде кітаптың жарық көруін ерекше оқиға деп атап, бұл еңбектің жастарға мотивация берсе деген тілегін жеткізді.

Іс-шара соңында кітаптың тұсауы кесіліп, оқырманға таныстырылды.