Қазақстанда Инвесторлардың ұлттық тізіліміне енгізілген кәсіпкерлерге арнайы қолдау көрсетіледі, ал тізімге енбеген бизнес өкілдерінің құқықтары да прокуратураның бақылауында болады, — деп хабарлайды «Dalamedia» ақпараттық порталы.

Бұл туралы Инвесторлардың құқықтарын қорғау комитеті төрағасының міндетін атқарушы Арман Хасенов мәлімдеді. Оның айтуынша, өткен жылдың соңында құрылған комитет ұлттық тізілімге енген инвесторлардың жобаларын сүйемелдеумен айналысады. Осы мақсатта инвестициялық жобалар туралы мәліметтер жинақталған цифрлық база қалыптастырылған.

Ұлттық тізілімге ену үшін инвестор өз жобасын ұсынып, оны қолдайтын уәкілетті ұйымдардың қорытындысын алуы қажет. Атап айтқанда, кәсіпкер Kazakh Invest немесе Сыртқы істер министрлігінің Инвестициялар комитеті арқылы жоба төлқұжатын рәсімдей алады.

Комитет өкілінің сөзінше, тізілімге енгізу бастамасы ең алдымен инвестордың өзінен шығуы тиіс. Ол үшін кәсіпкер әкімдікке, Kazakh Invest ұйымына немесе Инвестициялар комитетіне жүгінеді.

Арман Хасеновтың айтуынша, ұлттық тізілімдегі инвесторлар ұлттық және өңірлік деңгей болып екі санатқа бөлінеді. Ұлттық деңгейге инвестиция көлемі 150 мың айлық есептік көрсеткіштен асатын жобалар енгізіледі. Қазіргі бағаммен бұл шамамен 1,1 миллион доллар немесе 570 миллион теңгеден жоғары қаржы.

Ал бұдан аз қаражат салатын кәсіпкерлер өңірлік деңгейде тізілімге ене алады. Мұндай жағдайда жобалар әкімдіктер жанындағы арнайы комиссияларда қаралады. Өңірлік инвесторлар үшін ең төменгі инвестиция көлеміне қатысты талап қойылмайды.

Комитет мәліметінше, ұлттық тізілімдегі инвесторлар саны соңғы айларда айтарлықтай артқан. Егер өткен жылдың желтоқсанында тізімде шамамен 1900 инвестор болса, бүгінде олардың саны 3300-ге жеткен.

Сонымен қатар Арман Хасенов ұлттық тізілімге кірмеген кәсіпкерлердің де құқықтары қорғалатынын атап өтті. Оның айтуынша, бұл бағыттағы жұмысты прокуратураның қоғамдық мүдделерді қорғау қызметі жүзеге асырады. Аталған құрылым заңсыз тексерулерге, әкімшілік кедергілерге және бизнеске қысым көрсету деректеріне ден қояды.

«Инвесторлардың ұлттық тізіліміне енген кәсіпкерлердің құқығын қорғау үшін арнайы комитет құрылған. Дегенмен кәсіпкерлердің құқықтарының сақталуын қамтамасыз ету прокуратура қызметінің негізгі бағыттарының бірі болып қала береді», – деді ол.

Еске салайық, бұған дейін Қазақстан шетелдік инвесторлар мен білікті мамандар үшін көші-қон рәсімдерін жеңілдетуді жоспарлап отырғаны хабарланған болатын.