АҚШ 60 елден импортталатын тауарларға қосымша кедендік баж салығын енгізу мәселесін көтерді. Ұсынылған тізімге Қазақстан да енген, — деп хабарлайды «Dalamedia» ақпараттық порталы.

АҚШ Сауда жөніндегі өкілдігі 1974 жылғы Сауда туралы заңның 301-бабы аясында жүргізілген тергеулердің нәтижесін жариялады. Тергеу барысында түрлі мемлекеттердің мәжбүрлі еңбек арқылы өндірілген тауарлардың импортын шектеу және оған тосқауыл қою бағытында қаншалықты тиімді жұмыс істейтіні бағаланған.

Ведомствоның қорытындысына сәйкес, көптеген елдер мұндай өнімдердің сауда айналымына түсуіне жеткілікті деңгейде кедергі келтірмейді. АҚШ мұны америкалық компаниялар мен жұмысшылар үшін әділетсіз бәсекелестік деп санайды.

АҚШ-тың Сауда жөніндегі өкілі Джеймисон Грирдің айтуынша, бірқатар мемлекет мәжбүрлі еңбекпен өндірілген тауарларға қатысты шектеу енгізу бағытында алғашқы қадамдар жасағанымен, бұл жеткіліксіз. Оның пікірінше, барлық сауда серіктестері еңбек құқығының бұзылуына қарсы күресті күшейтуі тиіс.

Осыған байланысты АҚШ Сауда жөніндегі өкілдігі тергеуге іліккен елдерден келетін импорттық өнімдерге қосымша тариф енгізуді ұсынды. Ұсынысқа сәйкес, мәжбүрлі еңбекпен өндірілген тауарларды әкелуге тыйым салатын және мұндай міндеттемелерді сауда келісімдерінде бекіткен елдер үшін қосымша баж салығы 10 пайыз көлемінде болуы мүмкін. Ал қалған мемлекеттер үшін бұл көрсеткіш 12,5 пайыз деңгейінде ұсынылған.

Қазақстан АҚШ жариялаған 54 елдің тізіміне енгізілді. Бұл санаттағы мемлекеттер мәжбүрлі еңбекпен өндірілген тауарлардың импортына толыққанды тыйым енгізбеген немесе оны тиімді жүзеге асыра алмаған елдер ретінде көрсетілген.

Қазіргі уақытта АҚШ тарапы ұсынылған шаралар бойынша қоғамдық талқылау өткізіп жатыр. Мүдделі тараптар өз пікірлері мен ұсыныстарын жолдай алады. Ал 2026 жылғы 7 шілдеде ашық тыңдаулар өткізу жоспарланған. Соның нәтижесінде тарифтерді енгізу жөнінде түпкілікті шешім қабылданады.

Еске салайық, бұған дейін Қазақстанда AliExpress, Amazon және Temu секілді шетелдік маркетплейстер арқылы жасалатын сатып алуларға қатысты жаңа ережелер әзірленіп жатқаны хабарланған болатын. Жаңа талаптарға сәйкес, мұндай тауарлар жеке пайдалануға арналған өнім емес, «электрондық сауда тауарлары» ретінде жеке санатқа бөлініп, оларға арнайы кедендік рәсімдер қолданылмақ.