Премьер-министр Олжас Бектенов «Қазмырыш» кәсіпорнындағы жарылысқа қатысты компанияның бас директоры Жанат Жанботиннің баяндамасын сынға алды, — деп хабарлайды «Dalamedia» ақпараттық порталы.

Үкімет отырысында Жанат Жанботин 2023 жылдан бері кәсіпорында өліммен аяқталған оқиғалар тіркелмегенін, сондай-ақ жыл сайын еңбек қауіпсіздігіне 27 миллиард теңгеден астам қаржы бөлінетінін айтты.

Сондай-ақ ол 5 мамыр күні мырыш зауытының электролиз цехында болған апатқа тоқталып, түтін сорғышты іске қосу кезінде жарылыс болып, артынша өрт шыққанын, ғимараттың бір бөлігі опырылғанын жеткізді. Сол қайғылы оқиға салдарынан үш адам қаза тапқан.

Алайда Премьер-министр бұл деректер мен нақты жағдайдың сәйкес келмейтінін айтып, компания басшысының есебін сынға алды.

«Баяндаманы жақсы оқыдыңыз. Бірақ мамыр айында болған жағдай айтқандарыңызды жоққа шығарып отыр. Сондықтан қосымша әрі нақты шаралар қабылдау қажет», – деді Олжас Бектенов.

Үкімет басшысы еңбек және өндірістік қауіпсіздік мәселелерін күшейтіп бақылауға алудың маңызын да атап өтті.

Еске салайық, 5 мамыр күні Өскемендегі «Қазмырыш» ЖШС-нің қорғасын зауыты аумағында электролиз цехының балқыту бөлімінде жарылыс болып, өрт шыққан. 120 шаршы метр аумақты от шарпыған, ал 220 шаршы метр аумақта құрылымдар опырылған. Құтқарушылар келген кезде цех ашық жалынмен жанып жатқан.

Оқиға салдарынан үш адам қаза тауып, бес адам ауруханаға жеткізілген. Олардың үшеуі жеңіл жарақатпен үйлеріне шығарылса, екі адам ауыр халде ем қабылдаған.