Қазақстандағы 2026–2027 оқу жылына 89 мыңнан астам мемлекеттік білім гранты бөлінді, — деп хабарлайды «Dalamedia» ақпараттық порталы.

Бұл туралы Үкімет отырысында ғылым және жоғары білім министрі Саясат Нұрбек мәлімдеп, жоғары білімі бар кадрларды даярлауға арналған мемлекеттік тапсырыс көлемі бұрынғы жылдар деңгейінде сақталып отырғанын атап өтті.

Министрдің айтуынша, алдағы оқу жылына барлығы 89 457 грант қарастырылған. Оның ішінде 75 371-і бакалавриатқа, 11 007-і магистратураға, ал 3 079-ы докторантураға бөлінген.

Гранттарды бөлу кезінде ел экономикасының 2030 жылға дейінгі кадрлық қажеттілігі негізге алынған. Ведомство дерегіне сәйкес, гранттардың басым бөлігі инженерлік-техникалық және ауыл шаруашылығы салаларына бағытталған — жалпы көлемнің 60 пайызы осы бағыттарға тиесілі. Ал педагог кадрларды даярлауға 21 пайыз бөлінген.

Салалар бойынша тарқатсақ, инженерлік, өңдеу және құрылыс бағыттарына 19 250 грант берілген. Педагогикалық ғылымдарға — 13 738, ақпараттық-коммуникациялық технологияларға — 11 662, жаратылыстану, математика және статистика салаларына — 9 363 грант қарастырылған. Сонымен қатар ауыл шаруашылығы мен биоресурстарға — 3 145, денсаулық сақтау саласына — 2 700, қызмет көрсету саласына — 2 400, өнер және гуманитарлық бағыттарға — 1 915, әлеуметтік ғылымдар, журналистика және ақпарат саласына — 1 485, бизнес, басқару және құқыққа — 1 423, ветеринарияға 1 275 грант бөлінген.

Бұдан бөлек, елімізде «Серпін» бағдарламасы аясында кәсіптік бағдар беру жұмыстары жүргізіліп жатыр. Бұл шараларға 13 мыңнан астам оқушы, 2 мыңға жуық ата-ана және 700-ден аса маман қамтылған.

Педагогикалық және медициналық бағыттарға түсетін талапкерлер үшін арнайы емтихандар қарастырылған. Ал шығармашылық мамандықтарға тапсыратындар бөлек шығармашылық сынақтан өтеді.

Министрдің айтуынша, грант конкурсына құжат қабылдау 13–20 шілде аралығында жүргізіледі. Ал жоғары оқу орындарына қабылдау үдерісі 25 тамызға дейін толық аяқталады.

Айта кетейік, бұған дейін әлеуметтік желіде қазақ және орыс бөлімдеріндегі өту балдарының айырмашылығына қатысты пікірталас туындаған еді. Кейбір деректерде талаптардың әртүрлілігі әділетсіз деп бағаланған. Министрлік болса, конкурс бірыңғай талаптар негізінде өтетінін және мәселе бақылауда екенін мәлімдеген.