Қытайдан арзан көлік алған қазақстандықтар күтпеген қиындыққа тап болды. Елдің әр өңіріндегі жүргізушілердің шоттары бұғатталып, оларға миллион теңгеге жуық қарыз шығып жатқанын айтады, — деп хабарлайды «Dalamedia» ақпараттық порталы.

Көлік иелерінің сөзінше, олар барлық кедендік рәсімді заң аясында өткізіп, қажетті төлемдерді толық төлеген. Алайда арада бір жыл өткенде мемлекеттік органдар қосымша баж салығын талап ете бастаған.

Алматылық Нариман Сәндібек былтыр Қытайдан BYD Destroyer 05 маркалы гибрид көлігін 7,5 миллион теңгеге сатып алған. Оның айтуынша, көлікті еш қиындықсыз тіркеп, мемлекеттік нөмір алып, бір жыл бойы пайдаланып жүрген.

“Ешқандай ескертусіз жеке кәсіпкерлік шотымды бұғаттап тастады. Салық органына барғанымда, кеденге тағы бір миллион теңге төлеуім керек екенін айтты. Барлық төлемді уақытында жасағанмын. Енді бұл қарыз қайдан шыққанын түсінбеймін”, – дейді ол.

Осындай жағдайға тап болғандардың саны аз емес. Жүргізушілердің айтуынша, еліміз бойынша бес мыңға жуық адамда дәл осындай мәселе туындаған.

Көлік иелері жеңілдікпен рәсімдеу үшін барлық құжатты өткізіп, арнайы тексеруден өткендерін айтады. Олардың сөзінше, тиісті мамандар көлікті қарап, тексеріп, содан кейін ғана кедендік жеңілдікке рұқсат берген.

“Біз барлық құжатты тапсырдық. Мамандар көлікті тексеріп, қорытынды берді. Сол құжаттың негізінде көлікті нөлдік баж салығымен өткіздік”, – дейді Алматы тұрғыны Жасұлан Әбуғалиев.

Ал тағы бір жүргізуші Дәулет Әшімханның айтуынша, бастапқыда берілген рұқсат кейін күшін жойған.

“Құжаттың мерзімі 2027 жылға дейін жарамды болуы керек еді. Бірақ кейін оны алып тастап, бәрімізге айыппұл жіберді”, – дейді ол.

Ал Алматы қаласы бойынша мемлекеттік кірістер департаменті бұл жағдайды кедендік бақылау нәтижесімен байланыстырады. Ведомство өкілдерінің айтуынша, кей жүргізушілер кедендік баж төленбейтін тауар кодын пайдаланған.

Мекеменің камералдық тексерулер бөлімінің басшысы Ержан Шадыров үш жыл ішінде жүргізілген тексеру барысында заңбұзушылық белгілері анықталғанын мәлімдеді.

Алайда көлік иелері бұған келіспейді. Олар бастапқыда мемлекеттік органдардың өздері рұқсат бергенін айтып, бұғатталған шоттарды ашып, қосымша қарызды жоюды талап етіп отыр.