Қазақстанда мүгедектік рәсімдеу кезінде жалған медициналық құжаттарды пайдалану деректері анықталды, ,-деп хабарлайды «Dalamedia» ақпараттық порталы.

Еңбек және халықты әлеуметтік қорғау министрлігінің мәліметінше, медициналық құжаттарды тексеру барысында қолдан жасалғаны күмән тудыратын 167 жағдай тіркелген.

Ведомствоның хабарлауынша, тексеріс кезінде жүйелі сипаттағы заңбұзушылықтар анықталған. Кейбір дәрігерлер әртүрлі азаматтарға мазмұны бірдей медициналық қорытындыларды рәсімдеген болуы мүмкін. Атап айтқанда, бірнеше науқасқа бір үлгідегі құжаттардың көшіріліп берілгені белгілі болды.

Сондай-ақ зертханалық сараптама нәтижелері, науқастың ауру тарихы мен мамандар қорытындысының толықтай сәйкес келетін жағдайлары анықталған. Мұндай құжаттарда тек азаматтардың жеке деректері мен тексеруден өткен күндері өзгертіліп, қалған мәтін сол күйінде қалдырылған.

Аталған материалдардың барлығы құқық қорғау органдарына жолданған. Оның ішінде прокуратура мен экономикалық тергеп-тексеру департаменті де бар.

Қазір комитеттің аумақтық департаменттеріне қайта бақылау куәландыруларын жүргізу тапсырылған. Бүгінге дейін оның 73-і орындалған. Күдік тудырған жағдайлар бойынша әлеуметтік төлемдер уақытша тоқтатылды. Егер заңбұзушылық дәлелденсе, мүгедектік тағайындау туралы бұрынғы шешімдер қайта қаралады.

Еске салайық, бұған дейін Тараз тұрғыны жалған құжат рәсімдеп, мемлекеттен заңсыз пәтер алғаны туралы ақпарат тараған еді.