«Бірлік – бейбітшілік бесігі». Алматы қаласында Қазақстан халқының бірлігі күніне арналған ерекше флешмоб өтті. Іс-шараға 6500 оқушы қатысып, олар бейбітшіліктің символы саналатын ақ көгершіннің бейнесін бірлесе құрастырды,-деп хабарлайды «Dalamedia» ақпараттық порталы.

Мерекелік жиында оқушылар үйлесімді қимылдарымен көпшіліктің назарын аударды. Олар бірге «Ақ көгершін» әнін орындап, көрермендерге көтеріңкі көңіл күй сыйлады. Ұйымдастырушылар мұндай форматтағы шараның басты мақсаты – жас ұрпақ арасында достық пен өзара сыйластықты дәріптеу екенін айтты.

Бағдарлама барысында әртүрлі этнос өкілдері өздерінің ұлттық өнерін көрсетіп, Қазақстандағы мәдени әралуандық пен татулықты айқын көрсетті.

№56 гимназия оқушысы Зулайхо Исмаилова флешмобтың ерекше әсер қалдырғанын айтып, достарымен бірге көңілді уақыт өткізгенін жеткізді. Оның сөзінше, сыныптастарының ұлты әртүрлі болғанымен, барлығы тату-тәтті араласады.

Ал Медеу аудандық білім бөлімінің басшысы Ақнұр Нұрәлиева шараның негізгі мәні – еліміздегі түрлі ұлт өкілдерінің бір шаңырақ астында бейбіт өмір сүріп жатқанын насихаттау екенін атап өтті.