Жамбыл облысы Т.Рысқұлов ауданы Қарақыстақ ауылында «Gakku Qus» ЖШС асыл тұқымды құс шаруашылығы репродукторының іргетасына капсула салды,-деп хабарлайды даламедиа ақпараттық порталы. 

Жоба туралы
Құны: 3,5 млрд теңге
Кезеңдері: 1-кезеңде жылына 10 млн, 2-кезеңде 60 млн инкубациялық жұмыртқа өндіру
Іске қосылуы: 2027 жылдың 1-тоқсаны
Жұмыс орны: Құрылыста 120 адам, іске қосылған соң 80-100 жаңа орын. 60-70%-ы жергілікті тұрғындарға беріледі

Облыс әкімі Ербол Қарашөкеев Мемлекет басшысының тапсырмасына сай ішкі нарықты отандық өніммен қамтып, импортқа тәуелділікті азайту басымдық екенін айтты. Құс шаруашылығы — стратегиялық сала. Репродуктор іске қосылса, өңір сапалы тұқымдық материалмен қамтылып, өнімнің өзіндік құны төмендейді.

«Gakku Qus» құрылтайшысы Фарида Жүнісованың сөзінше, қазір тұқымдық шикізаттың 80%-ы шетелден келеді. Жаңа кәсіпорын бұл олқылықты толтырып, жұмыртқаларды отандық фабрикаларға және экспортқа жібереді.

Айта кетейік, Жамбыл облысының инвестициялық қоржынында 5,9 трлн теңгенің 116 жобасы бар. 2024 жылы 21 жоба іске асып, 550 жұмыс орны ашылды. Биыл 471 млрд теңгенің 47 жобасы жоспарланған.