Қазақстанда мектеп бюджеті мен мұғалімдерді басқару құзыретін облыстық деңгейден аудан және қала әкімдіктеріне беру мәселесі қаралып жатыр, -деп хабарлайды «Dalamedia» ақпараттық порталы. Бұл бастаманы депутаттар мен Ұлттық экономика министрлігінің өкілдері көтерген. Алайда ұсыныс педагогтер арасында алаңдаушылық туғызды.

Мәжіліс депутаты Асхат Аймағамбетовтің айтуынша, бұл мәселеге қатысты соңғы шешім әлі қабылданған жоқ. Қазір бастама Үкіметтің қарауында жатыр.

Депутат мұғалімдердің алаңдауын түсінуге болатынын айтты. Оның сөзінше, білім саласы өкілдері 2019-2020 жылдардағы жағдайды жақсы біледі және қазіргі ахуалмен салыстырғанда айырмашылық айқын сезіледі. Сол себепті педагогтердің бұрынғы жүйеге қайта оралуға қатысты күмәні мен қорқынышы орынды.

Сонымен қатар Аймағамбетов мәселе әлі де жан-жақты талқыланып жатқанын жеткізді. Қаралып жатқан нұсқалардың бірі бойынша кейбір өкілеттіктерді әкімдіктерге беру, ал негізгі саясат пен кадрлық тағайындауларды жоғары деңгейде қалдыру көзделіп отыр.

Ол Үкімет барлық тараптың мүддесін ескеріп, тиімді шешім қабылдайтынына сенім білдірді.