Қостанайда ондаған адамды алдап, 123 миллион теңгеден астам шығын келтірген кәсіпкер бас бостандығынан айырылған жоқ, — деп хабарлайды «Dalamedia» ақпараттық порталы.

Тергеу мәліметтерінше, «Bolashak Construction Company KZ» ЖШС директоры Уәлихан Нысанов 2022–2024 жылдары өзіне қарасты екі компания арқылы жұмыс жүргізген. Осы кезеңде ол «Семья» тұрғын үй кешеніндегі пәтерлерге қатысты заңсыз келісімшарттар жасасқан. Соның салдарынан 28 адам жалпы сомасы 123 миллион теңгеден асатын материалдық шығынға ұшыраған. Кәсіпкердің әрекеті сотта аса ірі көлемдегі алаяқтық ретінде бағаланды. Сот барысында айыпталушы кінәсін толық мойындап, келтірілген шығынды түгел өтеген. Жәбірленушілер де талап-арыздарынан бас тартқан.

Нәтижесінде сот оған 6 жыл 8 ай жаза тағайындап, қосымша 5 жылға құрылыс саласындағы коммерциялық ұйымдарда басшылық қызмет атқару құқығынан айырды. Алайда «Қазақстан Республикасы Конституциясының отыз жылдығына орай рақымшылық жасау туралы» заң негізінде негізгі жаза шартты түрде 5 жыл 4 айға дейін қысқарды.