Жетісу облысында іссапар шығындарын өз қалтасынан төлеп келген мұғалімдердің берешегі өтелді — деп хабарлайды «Dalamedia» ақпараттық порталы.

Бұл туралы Жетісу облысы прокуратурасының баспасөз қызметі мәлімдеді.Панфилов ауданы прокуратурасы жүргізген тексеріс барысында аудандық білім бөлімі тарапынан педагогтердің іссапар шығындары уақытында төленбей, жалпы көлемі 72 миллион теңгеге жуық қарыз жиналғаны анықталған. Соның салдарынан мұғалімдер қызметтік сапар шығындарын өз қаражаты есебінен өтеуге мәжбүр болған.

Қадағалау органы өтемақының дер кезінде төленуі еңбек құқығын сақтаудың негізгі талабы екенін алға тартып, уәкілетті мекемеге тиісті ұсыныс енгізген.

Нәтижесінде жиналған берешек толық өтеліп, 492 педагог өздеріне тиесілі қаражатты түгел алған.