Әлемдегі ең әдемі есім белгілі болды, — деп хабарлайды «Dalamedia» ақпараттық порталы Blikk басылымына сілтеме жасап.

Ғалымдар жүргізген зерттеу нәтижесінде Sophia есімі ең әдемі есім деп танылған. Мамандардың айтуынша, бұл атау әуезді дыбысталуымен және түрлі тіл мен мәдениетке оңай сіңісуімен ерекшеленеді.

Зерттеу барысында жүзге жуық есім қарастырылып, қатысушылар олардың дыбыстық үйлесімін бағалаған. Нәтижесінде Sophia атауы ең жоғары ұпай жинаған. Мамандардың айтуынша, бұл шешімге Sophia есіміндегі жұмсақ дауыссыздар мен әуезді дауысты дыбыстардың үйлесімділігі әсер еткен. Осындай дыбыстық тепе-теңдік құлаққа жағымды естіледі.

University of Birmingham лингвистерінің айтуынша, Sophia атауы тек дыбысталуы жағынан ғана емес, мағынасы мен тарихи тамыры тұрғысынан да терең мәнге ие. Ол ежелгі грек тіліндегі «даналық» дегенді білдіретін «σοφία» сөзінен шыққан.

Алғашында бұл атау Рим империясының грек тілінде сөйлейтін шығыс аймақтарында белгілі болды. Кейін славян елдеріне, одан әрі Батыс Еуропаға тарады. XVI ғасырдан бастап бұл есім көптеген мемлекетте кең қолданыла бастады.

Бүгінде Sophia атауының Sophia, Sofía, Sofie, Sophie немесе Zsófia секілді түрлі нұсқалары әлемнің көптеген тілінде кездеседі. Дыбысталуы жеңіл, мағынасы жағымды болғандықтан, көптеген ата-ана бұл есімді баласына қоюды жөн көреді.

Зерттеушілердің пікірінше, бұл атаудың тартымдылығы оның тарихы, философиялық мәні және заманауи әсемдігінің үйлесімінен қалыптасқан. Сондықтан Sophia есімі әлем бойынша ең кең таралған әрі жоғары бағаланатын есімдердің бірі саналады.