Ақмола облысында көкпар жаттығуы кезінде жасөспірімнің қаза табуына байланысты Мәжіліс депутаты Болат Керімбек ұлттық ойындардағы қауіпсіздік мәселесін көтерді, -деп хабарлайды «Dalamedia» ақпараттық порталы.

Депутаттың айтуынша, көкпар қазақ халқының маңызды ұлттық мұраларының бірі болғанымен, жарыстардың басым бөлігі бейресми түрде ұйымдастырылып, тиісті бақылаусыз өтіп жатады. Оның мәліметінше, тек өткен жылдың қараша-желтоқсан айларында Жамбыл, Түркістан, Қызылорда және Алматы облыстарында 130-ға жуық ресми жарыс өткізілген. Ал биылғы наурыз-сәуір айларында 80-нен астам турнир ұйымдастырылған.

Мәжілісмен кейбір ойындарға бірнеше жүзден екі мыңға дейін адам қатысатынын айтып, мұндай жағдайда қауіпсіздік талаптарын толық сақтау қиын екенін жеткізді. Сондай-ақ ол жас шектеулеріне, медициналық қамтамасыз етуге және аттарды ұстау тәртібіне қатысты нақты ережелердің жоқтығына назар аударды.

Болат Керімбектің айтуынша, жарыстар барысында жануарларға қатыгездік көрсету, допинг қолдану және әдейі қақтығысу секілді жағдайлар да кездеседі.

Депутаттың бұл ұсынысына 26 мамыр күні Ақмола облысының Целиноград ауданында болған қайғылы оқиға түрткі болған. Алдын ала мәлімет бойынша, көкпар жаттығуы кезінде 14 жастағы жасөспірім аттан құлап, ауыр жарақат салдарынан көз жұмған. Шараның ресми келісімсіз ұйымдастырылғаны айтылып отыр.

Осыған байланысты мәжілісмен бұқаралық көкпар ойындары үшін бірыңғай қауіпсіздік стандарттарын әзірлеп, бекіту қажет екенін мәлімдеді.