Премьер-министр Олжас Бектенов Алматы облысының әкімі Марат Сұлтанғазиевті коммуналдық инфрақұрылым жобаларының кешігуіне байланысты сынға алды. Өңір жөндеу жұмыстарына қатысты өтінімдердің орындалуы бойынша «қызыл» аймаққа енген, — деп хабарлайды «Dalamedia» ақпараттық порталы.

Үкімет отырысында Алматы облысындағы коммуналдық инфрақұрылым жобаларының жүзеге асырылу барысы талқыланды. Премьер-министр өңір басшысынан жұмыстардың не себепті баяу жүріп жатқанын сұрады.

Марат Сұлтанғазиев кейбір жобалардың қазір іске асырылып жатқанын айтты. Сондай-ақ тағы екі жоба бойынша прокуратура араласқаннан кейін қайта конкурс өткізу қажет болғанын жеткізді. Оның айтуынша, Қаржы министрлігі бұл жобаларды басым бағыттар тізіміне енгізбей, қаржыландыруды тоқтатқан.

Алайда әкімнің баяндамасынан кейін Олжас Бектенов мұндай түсіндірулерден жауапкершілік әкімдіктен басқа барлық тарапқа жүктеліп тұрғандай әсер қалғанын айтты.

«Сізді тыңдасақ, өзіңізден басқаның бәрі кінәлі. Жұмысты жеделдетіңіз», — деді Премьер-министр.

Ұлттық экономика министрлігінің мәліметінше, Алматы облысынан бөлек, ұлттық жобаларды іске асыру бойынша «қызыл» аймақта Шымкент қаласы мен Ұлытау облысы да бар.