Соңғы уақытта әлеуметтік желілерде «мешітке садақа бер», «медресеге ақша аудар», «кофе ішкенше садақа жаса», «балмұздақ алғанша қайырымдылыққа үлес қос» деген мазмұндағы бейнероликтер жиілеп кетті. Бұл видеолар қоғамда түрлі пікір туғызып отыр, — деп хабарлайды «Dalamedia» ақпараттық порталы.

Бірқатар азаматтар мұны игі іске үндейтін қарапайым үндеу деп қабылдаса, енді бірі мұндай тәсіл адамдардың ар-ожданына әсер етіп, психологиялық қысым жасайды деп санайды. Әлеуметтік желі қолданушыларының бірі бүгінде садақа жинау жеке бастама емес, тұтас бір жүйеге айналып бара жатқандай әсер қалдыратынын жазды.

Оның айтуынша, көптеген бейнероликте адамдардың күнделікті шығыны садақамен салыстырылып, өз қажетіне ақша жұмсаған адам өзін кінәлі сезінетіндей әсер қалыптастырылады.

Желіде жарияланған пікірлердің бірінде «Қазақстанның бәрін медресеге айналдырмақ па? Жыл сайын жаңа құрылыс, жаңа ақша жинау басталады. Ал мектеп, ғылым, аурухана, жетім балалар немесе студенттер үшін дәл осындай белсенді үндеулер неге аз?» деген сауал қойылған.

Пікір білдірушілердің бір бөлігі мәселе садақаның өзінде емес, оны ұсыну тәсілінде екенін алға тартты. Олардың сөзінше, соңғы кезде кейбір діни парақшалар рухани ағартудан гөрі онлайн-донат жүйесіне көбірек ұқсап кеткен.

Кейбір қолданушылар мұндай жарнамалар адамдардың қорқынышы мен кінә сезімін қозғауға құрылғанын жазды. Олар садақа шынайы ниетпен берілуі тиіс екенін, ал қысым көрсету арқылы қайырымдылыққа шақыру дұрыс емес екенін айтты.

Желіде «осындай видеолардан кейін садақа беруге деген ниетім жоғалды», «құлшылық пен қайырымдылықты ешкім күштеп таңбауы керек», «адамды қорқыту арқылы сауапқа шақыру дұрыс емес» деген пікірлер де жарияланды.

Сондай-ақ кейбір оқырмандар жиналған қаражаттың қаншасы нақты мешіт құрылысына, қаншасы жарнамаға, бейнеролик түсіруге немесе блогерлердің қызметіне жұмсалатыны ашық көрсетілмейтінін сынға алды.

Сонымен бірге мұндай пікірмен келіспейтіндер де болды. Олар ешкімнің ешкімді садақа беруге мәжбүрлемейтінін, әр адамның таңдау жасауға толық құқығы бар екенін айтты.

ҚМДБ-ның Діни білім және кадр даярлау бөлімінің меңгерушісі Хасан Аманқұлов әлеуметтік желілерде мешіт пен медресе атынан қаражат жинайтын парақшалардың басым бөлігі діни басқармаға қарамайтынын мәлімдеді.

Оның айтуынша, ҚМДБ әлеуметтік желі арқылы халықтан ақша жинауға үндемейді және мұндай бастамаларды қолдамайды.

Сондай-ақ ол қайырымдылық жасағысы келетін азаматтарға қаржы аудармас бұрын қордың немесе ұйымдастырушының заңды тіркелгенін, байланыс деректерін және қаржының қалай жұмсалғаны жөніндегі есептерін мұқият тексеруге кеңес берді. Белгісіз жеке есепшоттарға ақша аударудан сақ болған жөн екенін ескертті.

Хасан Аманқұловтың сөзінше, ресми мешіттер мен медреселердің арнайы есепшоттары бар және қайырымдылықты сол ресми реквизиттер арқылы аудару қауіпсіз.

Сондай-ақ ол елімізде мешіттер мен медреселердің құрылысы әлеуметтік желідегі тұрақты ақша жинау арқылы емес, негізінен демеушілердің қолдауымен немесе тұрғындардың асар жасауымен жүзеге асатынын айтты.