Президент Қасым-Жомарт Тоқаев Алатау қаласын заманауи технологиялар, инвестициялар және таланттар шоғырланған жаңа мегаполис ретінде дамыту жоспарын айтты, — деп хабарлайды «Dalamedia» ақпараттық порталы.

Мемлекет басшысының сөзінше, Digital by Default қағидаты негізінде бой көтеретін қала Еуразиядағы озық технологиялық орталықтардың біріне айналуы тиіс.

«Алатау қаласы Smart City шешімдері, интеллектуалды көлік жүйесі, цифрлық төлемдер, энергияны үнемдейтін нысандар және заманауи телекоммуникация инфрақұрылымы енгізілетін негізгі алаң болуы керек. Сонымен қатар ол өңірдегі жетекші цифрлық қаржы орталықтарының бірі ретінде қызмет атқаруға тиіс», – деді Қасым-Жомарт Тоқаев.

Президенттің айтуынша, бұл бағытта цифрлық активтерді дамыту, токендеу, блокчейн технологиялары мен криптоиндустрияға қатысты құқықтық реттеу жүйесі қалыптастырылып жатыр.

Қасым-Жомарт Тоқаев Алатау жобасына қатысушылар Астана халықаралық қаржы орталығы экожүйесінің мүмкіндіктерін пайдалана алатынын атап өтті. Оның сөзінше, аталған орталық ағылшын құқығы қағидаттары негізінде жұмыс істейді және онда әлемнің 90-нан астам елінен келген шамамен 6 мың компания тіркелген.

«Алатау қаласы болашақта Еуразиядағы таланттардың, технологиялар мен инвестициялардың жаңа орталығына айналады деп сенемін», – деді Мемлекет басшысы.