Атыраудағы жемқорлық ісі бойынша күдіктілер қатары артты. Қала әкімінің міндетін атқарушы Тлек Махуовпен бірге кәріз коллекторларын жөндеу жобасына қатысқан мердігер компания басшысы да қамауға алынған, — деп хабарлайды «Dalamedia» ақпараттық порталы.

Алдын ала мәлімет бойынша, тергеу Атырау қаласындағы кәріз коллекторларын күрделі жөндеу жобасына байланысты жүргізіліп жатыр. Жобаның бас мердігері — «Сапа Құрылыс 2007» ЖШС.

Ақпаратқа сәйкес, тергеу изоляторына «БУРМОНТАЖGROUP» ЖШС директоры Фархат Енсегенов қамалған. Ол Қылмыстық кодекстің 366-бабы 4-бөлігі, яғни аса ірі көлемде пара алу бабы бойынша күдікке ілінген. Аталған компания бұл жобада қосалқы мердігер ретінде жұмыс атқарған.

Сондай-ақ Тлек Махуов ұсталған кезде оның 25 жастағы ұлы Дәулет Алдарбергенұлы да ұсталғаны белгілі болды. Алайда тергеу шараларынан кейін ол босатылған. Кейбір мәліметтерге қарағанда, заңсыз қаржы осы азамат арқылы берілуі мүмкін деген болжам бар.

Алдын ала дерек бойынша, пара көлемі шамамен 600 миллион теңгені құраған. Оның алғашқы бөлігі — 100 миллион теңге берілгеннен кейін Ұлттық қауіпсіздік комитетінің Атырау облысы бойынша департаменті күдіктілерді ұстаған.

Ресми ақпарат алу үшін бірқатар мекемеге сауал жолданған. Қазіргі уақытта Атырау облыстық ҰҚК департаменті, облыстық прокуратура және қала әкімдігі тарапынан қосымша түсініктеме күтіліп отыр.

Айта кетейік, бұл Атырау қаласы әкімдігі басшылығына қатысты соңғы уақыттағы екінші ірі жемқорлық ісі. Бұған дейін қала әкімінің орынбасары Мейіржан Мұқасовқа қатысты қылмыстық іс қозғалған болатын.