Ресейлік руферлер Ангела Николау мен Иван Биркус Нью-Йорктегі әйгілі Empire State Building ғимаратының шпиліне заңсыз көтеріліп, сол жерде үйленуге ұсыныс жасаған. Әлеуметтік желіде тараған бұл оқиғадан кейін жұпты полиция ұстап, бірнеше бап бойынша айып тақты, — деп хабарлайды «Dalamedia» ақпараттық порталы.

33 жастағы Ангела Николау мен 32 жастағы Иван Биркус биіктігі 443 метр болатын зәулім ғимараттың ең жоғарғы бөлігіне көтеріліп, «Махаббаттың күші билікке деген махаббатты жеңгенде, әлемде бейбітшілік орнайды» деген жазуы бар баннерді ілген.

Осыдан кейін Иван Биркус бір тізерлеп отырып, сүйіктісіне неке сақинасын ұсынып, үйленуге ұсыныс жасаған. Ұсынысты қабылдаған жұп ғимараттан түсер алдында құшақтасып, сүйіскен.

Мәліметке сәйкес, олар шпильдің үстінде шамамен 10 минут болған. Ангела Николау мен Иван Биркус бұған дейін де әлемнің түрлі елдеріндегі биік ғимараттарға заңсыз көтеріліп танылған. Олардың өмірі туралы түсірілген Skywalkers: A Love Story деректі фильмі 2024 жылы Netflix платформасында жарық көрген.

Нью-Йорк полициясының мәліметінше, екеуіне заңсыз кіру, адамдардың өмірі мен денсаулығына қауіп төндіру, бөтен мүлікке зиян келтіру және қоғамдық тәртіпті бұзу баптары бойынша айып тағылған. Егер сот оларды кінәлі деп таныса, әрқайсысы бір жылға дейін бас бостандығынан айырылуы мүмкін.

Алдын ала мәлімет бойынша, жұп техникалық қызметкерлерге арналған жабық 103-қабатқа өтіп, сол жерден шпильге шыққан. Олардың бұл аймаққа қалай кіргені әзірге анықталған жоқ.

Оқиға орнында түсірілген полицияның бейнежазбасында тәртіп сақшысы арнайы баспалдақпен көтеріліп келіп, олардың бұл жерде болуына болмайтынын ескертеді. Кейін полицейлер жұптан қай тілде сөйлейтінін сұрағанда, Ангела Николау «Орыс тілінде» деп жауап берген.

Айта кетейік, бұған дейін Польшадағы экстремал Марсин Бано да Варшавадағы биік ғимаратқа ешқандай сақтандыру құралынсыз өрмелеп шығып, жұрт назарын аударған болатын.