Премьер-министрдің орынбасары Қанат Бозымбаев Түркістан облысында 12 адамның өмірін қиған өртке қатысты тергеу барысы жөнінде пікір білдірді, — деп хабарлайды «Dalamedia» ақпараттық порталы.

Үкіметтегі баспасөз мәслихатында журналистер вице-премьерден тергеудің қай деңгейде екенін сұраған.

Қанат Бозымбаевтың айтуынша, тергеу жұмыстары негізінен аяқталған. Алдын ала мәлімет бойынша, қайғылы оқиғаға тұрмыстық жағдай себеп болған.

“Түркістан облысындағы бір отбасыда болған өрт тұрмыстық себептерден шыққан. Менің білуімше, тергеу аяқталуға жақын. Үй ішінде электр құрылғылары болған”, – деді ол.

Вице-премьер қаза тапқандар саны көп болғандықтан арнайы үкіметтік комиссия құрылғанын да айтты.

“Бес адамнан көп адам көз жұмса, үкіметтік комиссия жасақталады. Оның құрамына Ішкі істер министрлігі, Төтенше жағдайлар министрлігі және өзге де мемлекеттік органдар кіреді. Алғашқы айда бірнеше рет бас қосып, жағдайды бақылауда ұстадық. Сараптамалардан кейін бұл оқиғаның тұрмыстық жағдайдан болғаны анықталды”, – деді Қанат Бозымбаев.

Еске салсақ, былтыр 18 қарашада Түркістан облысы Жетісай ауданындағы Алғабас ауылында жекеменшік тұрғын үйден өрт шыққан еді. Қайғылы оқиға салдарынан 9 бала мен 3 ересек адам қаза тапқан.

Өрт сөндірушілер жеткен сәтте үй толықтай жалынға оранғаны белгілі болды. Көршілердің сөзінше, сол күні үйде қонақтар болған. Үй иелері бір күн бұрын отбасылық шара өткізгендіктен, көп адам түнеп қалған.

Ал балалар омбудсмені Динара Закиева бұған дейін үйде екі отбасы тұрғанын мәлімдеген еді.