BAZIS-A Алматыдағы Баум тоғайын толық жаңғырту жобасын аяқтап, қалаға жаңартылған демалыс аймағын сыйға тартты, — деп хабарлайды «Dalamedia» ақпараттық порталы.

Компания тоғайды абаттандыру жұмыстарына өз қаржысынан 4,7 миллиард теңге бөлген. Жоба 2025 жылдың қыркүйегінде басталып, 2026 жылдың мамырында толық аяқталған.

130 жылдан астам тарихы бар Баум тоғайының негізін орманшы-ғалым Эдуард Баум қалаған. Жалпы аумағы 137,7 гектарды құрайтын бұл аумақ алматылықтардың сүйікті демалыс орындарының бірі саналады. Ұзақ жылдар бойы қарапайым жасыл аймақ ретінде сақталып келген тоғай енді жаңа келбетке ие болды.

Жоба барысында компания табиғи ортаның бастапқы қалпын сақтауға басымдық берген. Соның нәтижесінде бірде-бір ағаш кесілмеген. Керісінше, тоғай аумағына мыңнан астам жаңа көшет отырғызылған. Олардың қатарында шырша, қайың, тал, терек, тұт пен жиде ағаштары бар.

Абаттандыру жұмыстары алдымен серуендеу бағыттарын жаңартудан басталған. Жалпы ұзындығы 23 шақырымнан асатын жаяу жүргіншілер жолы, экосоқпақтар мен веложолдар ретке келтірілді. Веложолдарға асфальт төселсе, жаяу бағыттарға арнайы экологиялық жабын қолданылған.

Тоғай аумағында 196 орындық, 26 ландшафтық әткеншек, ондаған демалыс павильоны мен көлеңкелі самалжай орнатылған. Сонымен қатар пикник жасауға арналған алты арнайы алаң жабдықталған.

Балалар үшін жеті жаңа ойын алаңы салынды. Олар табиғи материалдардан жасалып, қауіпсіз жабынмен қапталған. Бұдан бөлек, воркаут алаңдары, үстел теннисіне және йогаға арналған аймақтар ашылған. Экстрим-велоспорт әуесқойлары үшін арнайы памп-трек те жасалды.

Кешкі уақытта тоғай ішінде қауіпсіз әрі жайлы жүру үшін мыңнан астам жарық шамы орнатылған. Сондай-ақ аумаққа заманауи бейнебақылау жүйесі енгізілді. Жаңа үлгідегі 109 камера нақты уақыт режимінде бақылау жүргізіп, ақпаратты полиция бекеттеріне тікелей жібереді.

Компания үй жануарларын серуендетуге арналған аймақты да жаңартқан. Иттерді жаттықтыру және серуендету алаңы кеңейтіліп, жаңа құрылғылармен жабдықталған.

Жаңартылған тоғайдың басты ерекшелігінің бірі — кіреберістердегі жаңа арт-нысандар. Сүйінбай даңғылы жағынан кіреберісте Эдуард Баум бейнесіне арналған мүсіндік композиция қойылған. Ал Сейфуллин даңғылы жағында «Жылдық сақиналар» атты ерекше композиция орнатылды.

Қазіргі таңда жаңартылған Баум тоғайы қала тұрғындары мен қонақтары үшін жайлы, қауіпсіз әрі тартымды экологиялық кеңістікке айналған. Компания өкілдері бұл жобаны Алматының дамуына қосылған маңызды үлес деп бағалап отыр.