Ақтөбе облысында әкімдік ғимаратында болған өрттен кейін нысанды қалпына келтіруге шамамен 90 миллион теңге қаражат жұмсалмақ. Қаржы төтенше жағдайлар резервінен бөлініп отыр, — деп хабарлайды «Dalamedia» ақпараттық порталы.

Еске салайық, биыл 7 сәуір күні Ақтөбе қаласындағы облыстық әкімдік ғимаратының шатырынан өрт шығып, шамамен 300 шаршы метр аумақты жалын шарпыған. Тілсіз жау бір сағатқа жетпей толық сөндірілген.

Мамандардың алдын ала болжамы бойынша, өрттің шығуына электр сымдарындағы қысқа тұйықталу себеп болуы мүмкін. Қазіргі таңда нақты қорытынды тергеу мен сараптама нәтижесінде анықталуда.

Жөндеу жұмыстары басталып кеткен. Қалпына келтіру процесін мамандандырылған ұйымдар жүргізбек. Шенеуніктердің айтуынша, негізгі мақсат — ғимаратты қауіпсіз әрі толыққанды жұмыс режиміне тезірек қайтару.

Айта кетерлігі, нысанды қалпына келтіру ісі арнайы бақылауда, ал түпкілікті шешімдер сараптамалар қорытындысынан кейін қабылданады.