Бұрын Нұрсұлтан Назарбаев әкімшілігінің басшысы қызметін атқарған Аслан Мусиннің отбасы өздеріне тиесілі компания арқылы Австрия астанасы Венадағы ең қымбат пәтерлердің бірін сатып алған, — деп хабарлайды «Dalamedia» ақпараттық порталы.

Сөз болып отырған пәтердің құны шамамен 4,5 млн еуроны (2,3 млрд теңге) құрайды. Бұл келісім өткен жылы Нойбау ауданындағы ең ірі жылжымайтын мүлік мәмілелерінің қатарына енген.

Нойбау — Венадағы орталық аудандардың бірі. Мұнда опера театры, Карлскирхе шіркеуі және қалалық ратуша сияқты негізгі нысандар жаяу жүретін қашықтықта орналасқан. Сонымен қатар аудан музейлер кварталымен, жаяу жүргіншілер көшелерімен және мерекелік жәрмеңкелерімен танымал.

413 шаршы метрлік пәтер Mondscheingasse көшесіндегі тарихи ғимаратта орналасқан. Ол жергілікті активтерді басқарумен айналысатын Bazantner GmbH компаниясының атына тіркелген. Қаржылық есептерге сәйкес, бұл нысан компанияның әзірге жалғыз активі болып отыр.

Компанияны Мусиндер отбасының шетелдік жобаларындағы көпжылдық серіктесі Сергей Кушенов басқарады. Құрылым Болгариядағы делдал компания арқылы БАӘ-де тіркелген қормен байланыстырылған. Бұл қор Аслан Мусиннің ұлы Сауранбек Мусин мен туысы Ануарбек Мусинмен байланысты деп көрсетіледі.

Бұған дейін Латвияда да отбасының ірі мәмілесі тіркелген — шамамен 5,6 млн еуроға (2,8 млрд теңге) тұрмыстық техника сататын компания сатып алынған. Сонымен қатар елде жылжымайтын мүлік нысандары да бар. Жалпы активтері 20 млн еуродан (10 млрд теңгеден астам) асады.

Отбасының негізгі бизнесі Болгарияда шоғырланған. София қаласында 200 млн еуродан астам инвестиция құйылған ауқымды құрылыс жобасы жүзеге асырылып жатыр. Жоба аясында кеңсе, тұрғын үй, мектептер, спорт кешендері және көлік тұрақтары салу жоспарланған.

«София парк» құрылыс компаниясының активтері 2024 жылғы дерек бойынша шамамен 68 млн еуро (34 млрд теңге) деп бағаланған.

Сонымен қатар отбасы мүшелері Болгария азаматтығын алған және елдің қоғамдық-саяси өміріне араласатыны айтылады. Аслан Мусин бұған дейін Балқан елдерінде дипломатиялық қызмет атқарып, Черногорияның құрметті азаматы атанған. Алайда соңғы жылдары бұл мәртебелерге қатысты тексерулер жүргізілуде.

Жалпы алғанда, шетелдік қорлар арқылы активтерді басқару құрылымының кеңеюі халықаралық қаржылық бақылаудың күшеюімен байланысты болуы мүмкін деген болжамдар айтылуда.