Әлемге әйгілі америкалық рэпер Эминем мен колумбиялық поп-жұлдыз Шакира Орталық Азияға арналған тур аясында Қазақстанға келуді жоспарлап отыр, ,-деп хабарлайды «Dalamedia» ақпараттық порталы.

Бұл ақпарат Алматы қаласы Қоғамдық кеңесінің №5 комиссия отырысында белгілі болды. Жиында «Спорттық нысандар дирекциясы» ЖШС-нің бас директоры Есет Байтасов қос әншінің концертіне қатысты нақты келіссөздер жүріп жатқанын мәлімдеді. Оның айтуынша, қазіргі таңда ұйымдастырушылық және техникалық мәселелер пысықталып, концерт күндерін бекіту кезеңі басталған.

Жоспар бойынша, екі концерт те 2026 жылы Алматыдағы Орталық стадионда өтуі мүмкін. Сонымен қатар, аталған нысанда жөндеу жұмыстары да қарастырылған. Атап айтқанда, футбол алаңын жаңартуға 25 миллион теңге, ал қосалқы алаңдағы жеңіл атлетика жолақтарын жөндеуге 37,7 миллион теңге бөлінуі көзделген. Алайда бұл жұмыстардың ірі концерттерге дейін немесе кейін жүргізілетіні нақты айтылмады.

Айта кетейік, бұған дейін танымал әнші Энрике Иглесиастың да Қазақстанда концерт беретіні хабарланған еді. Ол 3 қыркүйекте Астанада, ал 5 қыркүйекте Алматыда өнер көрсетпек.

Сондай-ақ былтыр америкалық жұлдыз Дженнифер Лопес «Up All Night: Live in 2025» туры аясында Қазақстанда алғаш рет концерт берген болатын. Оның Алматыдағы кешіне 27 мың көрермен жиналып, олардың 7 мыңға жуығы шетелден келген. Концерт билеттерінің бағасы 40 мыңнан 250 мың теңгеге дейін жеткен.

Мамандардың мәліметінше, мұндай ауқымды шаралар қала экономикасына да оң әсер етеді. Мәселен, Дженнифер Лопестің концерті кезінде салық түсімі шамамен 600 миллион теңгеге жетіп, жалпы қаржылық айналым 10 миллиард теңгеден асқан.