Қазақстандықтар Бірыңғай жинақтаушы зейнетақы қорындағы жеке шоттарындағы қаражаттың азайып кеткеніне шағымдануда, -деп хабарлайды «Dalamedia» ақпараттық порталы.

Әлеуметтік желілерде жұртшылық өз шоттарынан алынған скриншоттарды бөлісіп, тұрақты түрде жарна аударылып тұрғанына қарамастан, жалпы жинақ сомасы кемігенін айтып дабыл қаққан. Айтуларынша, соңғы айларда салынған қаражатқа қарағанда, шоттағы қалдық керісінше төмендеген.

Мәселен, қолданушылардың бірі 2026 жылдың ақпанынан сәуіріне дейінгі аралықта шотына тұрақты жарна түскеніне қарамастан, жалпы соманың шамамен 40 мың теңгеге азайғанын көрсеткен. Оның сөзінше, бұған инвестициялық табыстың төмендеуі әсер еткен.

Осы жағдай көпшілікті алаңдатып отыр. «Жарнаны уақытылы төлеп отырмыз, бірақ жинақ азайып жатыр. Мұндай жағдайда жеткіліктілік шегіне қалай жетеміз?» деген сауал жиі қойылуда.

Тағы бірқатар азаматтар да ұқсас жағдайды бастан өткергенін жазған. Бірі бірнеше күн ішінде 50 мың теңге жоғалтқанын айтса, енді бірі бірнеше айда 250 мың теңге, тіпті 1 миллион теңгеге дейін азайғанын алға тартқан.

Желі қолданушыларының айтуынша, олар шоттан ешқандай қаражат шешіп алмаған. Соған қарамастан, жинақ көлемінің қысқаруы көптің көкейінде күмән мен сұрақ тудырып отыр.