Қырғызстанның бұрынғы министрі әрі президенттікке кандидат болған Ұлықбек Кочкоровтың АҚШ-та курьер болып жұмыс істеп жүрген сәті түсірілген видео әлеуметтік желіде тарады. Кадрлар қоғамда түрлі пікір тудырып жатыр,-деп хабарлайды «Dalamedia» ақпараттық порталы.

Видеода оның көліктің жүксалғышына сәлемдемелер тиеп жатқаны көрінеді. Автордың айтуынша, экс-шенеунік қазіргі уақытта Amazon компаниясында курьер болып еңбек етеді.

Желі қолданушыларының бір бөлігі оның адал еңбек етіп жүргенін айтып қолдаса, енді бір бөлігі Қырғызстандағы мемлекеттік қызметтегі кезеңін еске алған.

Ұлықбек Кочкоров бұған дейін Қырғызстан парламентінің депутаты, сондай-ақ 2018–2020 жылдары еңбек және әлеуметтік даму министрі қызметін атқарған. 2017 жылы ел президенттігіне де кандидат ретінде қатысқан.

Соңғы жылдары ол отбасымен бірге Чикаго қаласында тұрып келеді. Қазіргі таңда саяси немесе қоғамдық қызметпен айналыспайды және АҚШ-тағы өмірі мен жұмысына қатысты пікір білдірмеген.