Қазақстанда көлік иелеріне арналған міндетті автосақтандыру полисінің құнын есептеу тәртібі өзгереді. Енді сақтандыру бағасы жүргізушінің жолдағы тәртібі мен апат тарихына көбірек байланысты болмақ, ,-деп хабарлайды «Dalamedia» ақпараттық порталы.

Қаржы нарығын реттеу және дамыту агенттігінің мәліметінше, өзгерістер негізінен «бонус-малус» жүйесіне қатысты. Бұл жүйе көлік иелерінің азаматтық-құқықтық жауапкершілігін міндетті сақтандыру полисінің бағасын анықтауға қолданылады. Қарапайым тілмен айтқанда, жол ережесін сақтап, апатқа түспейтін жүргізушілер сақтандыруды арзанырақ рәсімдейді, ал жол-көлік оқиғасына жиі ұшырайтындар үшін полис құны қымбаттайды.

Жаңа өзгерістер аясында сирек қолданылатын «М1» және «М2» кластары алынып тасталады. Агенттік бұл санаттар іс жүзінде өте аз пайдаланылатындықтан, олардан бас тарту туралы шешім қабылдаған.

Сондай-ақ сақтандырудың орташа құны өседі. Қазіргі орташа төлем 23 870 теңге болса, енді ол шамамен 28 130 теңгеге дейін көтерілуі мүмкін. Мұндай қадам жүйенің тұрақтылығын сақтау және жол апатынан зардап шеккендерге төлем жасау кепілдігін қамтамасыз ету үшін қажет екені айтылды.

Жүргізушілердің сақтандыру тарихына қарай 4-кластан 13-класқа дейінгі коэффициенттер де қайта қаралады. Соның нәтижесінде бұрын апатқа жиі түскен азаматтар үшін сақтандыру құны айтарлықтай қымбаттауы ықтимал.

Бұдан бөлек, сақтандыру компаниялары тәуекелді жеке бағалау тәсілін қолдана алады. Яғни бірыңғай дерекқор арқылы жүргізушінің апат тарихы, сақтандыру жағдайларының жиілігі және жалпы тәртібі ескеріледі. Соған байланысты полис бағасы 10 пайыз көлемінде төмендеуі немесе керісінше үстеме қосылуы мүмкін.

Ал жол ережесін сақтап, ұзақ уақыт апатсыз жүрген жүргізушілерге қосымша жеңілдік қарастырылған. Егер азамат бес жылдан астам уақыт бойы ең жоғары 13-класта болып, жол апатына түспесе, сақтандыру компаниясы оған стандартты деңгейден төмен баға ұсына алады.

Сонымен қатар өңірлік коэффициенттер де қайта есептеледі. Бұл өзгеріс аймақтардағы жол апаты деңгейі мен сақтандыру төлемдерінің көлемін дәлірек есептеу үшін енгізілмек. Яғни жол-көлік оқиғасы жиі тіркелетін өңірлерде сақтандыру құны жоғары болуы мүмкін