Атырауда мемлекеттік балық зауыты өзі өндіруге тиіс өнімді сырттан сатып алмақ болған. Атырау бекіре зауыты 147,4 миллион теңгеге бекіре уылдырығын сатып алу жөнінде тендер жариялаған, алайда бұл шешім заң талаптарына қайшы екені анықталды, -деп хабарлайды «Dalamedia» ақпараттық порталы.

Атырау облыстық прокуратурасының мәліметінше, қолданыстағы заңнамаға сәйкес мемлекеттік кәсіпорындар бекіре уылдырығын сатып алуға құқылы емес. Яғни, мұндай өнімді олар өздері өндіруі тиіс.

Қадағалау органының айтуынша, заң талаптары ескерілмей, зауыт негізсіз түрде уылдырық сатып алуды жоспарлаған. Соның нәтижесінде прокурорлар араласып, сатып алу рәсімі тоқтатылды. Бұл арқылы бюджет қаражатының 147 миллион теңгесі сақтап қалынды.

Заңға сәйкес, бекіре балығы мен оның уылдырығына қатысты барлық өндірістік және айналым процестері мемлекеттік кәсіпорындар арқылы жүзеге асырылады. Ал бұл өнімді сатып алатын жеке және заңды тұлғалар оны тек өңдеп, қайта сату қызметімен айналыса алады.

Сондай-ақ Қазақстандағы бекіре уылдырығының бағасы Ауыл шаруашылығы министрлігінің Балық шаруашылығы комитеті мен монополияға қарсы орган тарапынан бірлесіп реттелетіні атап өтілді.