Қазақстанда амбулаториялық дәрі-дәрмекпен қамтамасыз ету жүйесі жаңартылып, дәрілерді жекелендірілген тәртіппен сатып алу тетігі енгізіледі, ,-деп хабарлайды «Dalamedia» ақпараттық порталы.

Елде тегін амбулаториялық дәрі-дәрмекке бөлінетін қаржы көлемі жыл сайын артып келеді. Мәселен, 2018 жылы бұл мақсатқа 87,2 миллиард теңге қарастырылса, 2026 жылға жоспарланған қаржыландыру 337 миллиард теңгеге дейін ұлғайған. Осы аралықта тегін дәрі алатын азаматтар саны да көбейіп, 1,9 миллионнан 3,4 миллион адамға жеткен.

Денсаулық сақтау вице-министрі Тимур Мұратов қазіргі жүйеде дәрі-дәрмектің нақты қаншалықты тұтынылатыны толық ескерілмейтінін айтты. Оның сөзінше, осы олқылықтың орнын толтыру үшін биылдан бастап жаңа өтінім беру форматы іске қосылады.

Жаңа жүйе дәрігер науқасқа қандай дәрі жазып берсе, сол препаратты сатып алып, тікелей пациентке ұсыну қағидатымен жұмыс істемек. Бұл тәсіл артық немесе қажетсіз сатып алуды азайтып, нақты қажеттілікке сай қамтамасыз етуге мүмкіндік береді.

Вице-министрдің айтуынша, мұндай модельді енгізу үшін медициналық ұйымдар мен цифрлық платформалардың өзара байланысы күшейтіледі. Биыл жүйені көшіру жұмыстары басталса, 2027 жылдан бастап науқастар дәрігер тағайындаған қажетті дәрілерді толық көлемде ала бастайды.

Жаңартылған тетік әр адамның денсаулық жағдайы мен жеке ерекшеліктерін ескеріп, емдеу процесін барынша тиімді ұйымдастыруға жол ашады.